မီးပြတ်တဲ့အခါ သတိထားရှောင်ကြဉ်ပြီး မလုပ်သင့်တဲ့အရာများ

ရာသီဥတုကြောင့်ပဲဖြစ်ဖြစ်၊ ဓာတ်အားလိုင်းတွေ ပြင်ဆင်မှုကြောင့်ပဲဖြစ်ဖြစ် အချိန်မရွေး လျှပ်စစ်ဓာတ်အားလိုင်းတွေ ပြတ်တောက်တာမျိုး ကြုံကြရပါတယ်။ မိနစ်အနည်းငယ်ကနေ နာရီချီ ရက်ချီပြီး ဓာတ်အားပြတ်တောက်သွားနိုင်တာမျိုးတွေ ရှိတတ်တဲ့အတွက် အောက်ပါ အချက်လေးတွေကို သိထားသင့်ပါတယ်။ မီးပြတ်တဲ့အခါ မလုပ်သင့်တဲ့ အရာလေးတွေအကြောင်း ဖော်ပြပေးလိုက်ပါတယ်။

ဖယောင်းတိုင်မီး


မီးစက်အသုံးပြုမှုတွေလည်း ရှိပေမယ့် ခဏတာပဲ မီးပြတ်တဲ့အခါ များသောအားဖြင့် ဖယောင်းတိုင်မီးသာ အလွယ်ဆောင်ထားတတ်ကြပါတယ်။ အလင်းများများရအောင် ဖယောင်းတိုင်များများတောင် ထွန်းတတ်ကြပါသေးတယ်။ ဒါပေမယ့် ကလေးနဲ့ အိမ်မွေးတိရိစ္ဆာန်ရှိသူတွေကတော့ ဖယောင်းတိုင်မီးကို မသုံးသင့်ပါဘူး။ သူတို့လေးတွေ တိုက်ချမိတတ်တာကြောင့် မီးမတော်တဆမှု ဖြစ်နိုင်ချေများပြီး အဲဒီ့လိုမဟုတ်ရင်လည်း ကလေးတွေ အပူလောင်နိုင်ပါတယ်။ ဖယောင်းတိုင်အစား လျှပ်စစ်မီးအိမ်မျိုးကိုသာ သုံးသင့်ပါတယ်။ တကယ်လို့ မဖြစ်မနေသုံးရမယ့် အနေအထားမျိုးမှာလည်း သတိထား သင့်ပါတယ်။

ပလပ်ပေါက်တွေ


ဖုန်းအားသွင်းထားတာဖြစ်ဖြစ်၊ တီဗီကြည့်နေတာဖြစ်ဖြစ် မီးပြတ်သွားချိန်မှာ ပလပ်ပေါက်တွေ တပ်ရက်သား ဖြစ်နေတတ်ပါတယ်။ အဲ့လိုဆိုရင်တော့ မီးပြတ်သွားရင် ဖြုတ်ထားတာ အကောင်းဆုံးပါ။ မီးပြန်လာတဲ့အခါ မီးအားက ရုတ်တရက် များပြီး ဝင်တာမျိုးဖြစ်တတ်လို့ လျှပ်စစ်ပစ္စည်းတွေ ပျက်စီးတတ်သလို အခန့်မသင့်ရင် လျှပ်စစ်ရှော့ခ်တွေပါ ဖြစ်ပွားနိုင်ပါတယ်။

ရေခဲသေတ္တာ

ဒါကတော့ မပြောလည်း လူတော်တော်များများ ဆောင်ရွက်ကြမယ့်အရာလို့တော့ ထင်ပါတယ်။ မီးပြတ်နေတာကြောင့် ရေခဲသေတ္တာအထဲကို ကြာကြာဆက်အေးနေစေချင်ရင် မကြာခဏဖွင့်တာမျိုးတွေ၊ သေချာမပိတ်ထားတာမျိုးတွေ မလုပ်မိအောင် ဂရုစိုက်ဖို့ လိုပါတယ်။ ရေခဲသေတ္တာထဲက အအေးဓာတ် လိုတာထက် ပိုထွက်သွားပါက အထဲမှာ အအေးဓာတ်ကုန်ဆုံးသွားနိုင်ပြီး သင့်အစားအသောက်တွေ ထိခိုက်နိုင်ပါတယ်။


ဓာတ်ကြိုးပြတ်နေရင်

ဒီသတိပေးမှုကတော့ လူတုံးလူအတွေကို ပြောပြသလို ပြောတယ်လို့ ထင်ကောင်းထင်နိုင်ပေမယ့် လူဆိုတာ သတိမမူမိတဲ့ အခါမျိုးတွေ ရှိလို့ ပိုမိုသတိထားစေချင်တဲ့ အတွက်ပါ။ မီးပြတ်နေလို့ ဓာတ်ကြိုးပြတ်တွေနား ရောက်နေလည်း အန္တရာယ်မရှိနိုင်ဘူး ထင်ပြီး နေလိုက်ရင် ရုတ်တရက် မီးပြန်လာတဲ့အခါ ဒုက္ခရောက်သွားနိုင်ပါတယ်။ ဓာတ်ကြိုးပြတ်တွေနားကနေ အနည်းဆုံး ပေ (၃၀) ခွာပြီး နေသင့်ပါတယ်။

ဖုန်းသုံးတာ

မီးပြတ်သွားတာနဲ့ အပျင်းပြေဆိုပြီး ဖုန်းထပွတ်တတ်ကြပါတယ်။ တကယ်တော့ မီးပြတ်နေတုန်း ဖုန်းကို မလိုအပ်ဘဲ အားမကုန်စေသင့်ပါဘူး။ တကယ်အရေးကြီးတဲ့ ကိစ္စအတွက် လိုအပ်လာတဲ့အခါ ဖုန်းအားမရှိဘဲ ဖြစ်နေတတ်ပါတယ်။ ဒါကြောင့် မီးပြတ်နေရင် ဖုန်းမသုံးရမယ့်အပြင် အားကုန်စေတဲ့ app တွေကိုပါ ပိတ်ထားသင့်တာပါ။

Be the first to comment

Leave a Reply

Your email address will not be published.


*