ယာဉ်တိုက်မှု(၁၀)မျိုးနှင့် အမှားအမှန်ခွဲခြားနည်း ဥပဒေ

ယာဉ်တိုက်မှု(၁၀)မျိုးနှင့် ၂၀၂၀ မော်တော်ယာဉ်စီမံခန့်ခွဲမှုဥပဒေ

 

၁။ရပ်ထားသောယာဉ်ကို ဝင်ရောက်တိုက်မိခြင်း။

ရပ်ထားသောယာဉ်ကို အခြားယာဉ်တစ်စီးမှ ဝင်ရောက်မိတဲ့အခါမှာ တိုက်တဲ့ယာဉ်အမှားပဲဖြစ်ပါတယ်။ဒါပေမယ့်် ညအချိန်အမှောင်ထဲမှာ ဘေးမီးဖွင့်မထားဘဲ လမ်းမပေါ်ရပ်ထားခဲ့မယ်။

အန္တရာယ်မဖြစ်နိုင်အောင် သတိပေးမယ့်သူရှိမနေခဲ့ရင်တော့ ရပ်ထားတဲ့ယာဉ်မှာလည်း တာဝန်ရှိနိုင်ပါတယ်။

၂။ရှေ့ယာဉ်အားနောက်ယာဉ်မှ ဝင်ရောက်တိုက်မိခြင်း။

နောက်ကယာဉ်မှာတာဝန်ရှိပါတယ်။ ဒီနေရာမှာတချို့ကပြောကြပါတယ်။ရှေ့ယာဉ်က ရုတ်တရက် ဘရိတ်အုပ်လို့တိုက်ရတာပါလို့ ပြောကြပါတယ်။

ဒါပေမယ့် ယာဉ်သွားလာမှုစည်းကမ်း နည်းဥပဒေပုဒ်မ ၁၄၅မှာ ရှေ့ယာဉ်ရုတ်တရက်ရပ်တန့်လျှင် နောက်မှယာဉ်သည် ထိခိုက်မှုမဖြစ်စေရန် သင့်လျော်သောအကွာအဝေးမှ လိုက်ရမည်လို့ဖော်ပြထားပါတယ်။

သင့်လျော်သောအကွာအဝေး ဆိုတာကတော့ ပုံသေမရှိနိုင်ပါဘူး။ ရှေ့ယာဉ်အရှိန်များရင် များသလို အရှိန်နည်းရင်နည်းသလို ထိခိုက်မှုမရှိပဲ ရပ်တန့်နိုင်မယ့်အကွာအဝေးကို ချိန်ဆမောင်းနှင်ရမှာပါ။

အဲ့ဒီအတွက် ရှေ့ယာဉ်မှ ခွေးဖြတ်ပြေးလို့ဖြစ်ဖြစ် လူဖြတ်ပြေးလို့ပဲဖြစ်ဖြစ် အကြောင်းတစုံရာကြောင့် ရပ်တန့်ချိန်မှာ နောက်ယာဉ်သည်လည်း ထိခိုက်မှုမရှိအောင် ရပ်တန့်နိုင်ရပါမယ်။

ဖရီးကြောလို့ခေါ်တဲ့ ရပ်မျဉ်းမရှိတဲ့ ကွေ့ကြော တည့်ကြောမှာတိုက်ရင်တော့ ရှေ့ယာဉ်အမှားဖြစ်ပါတယ်။ လမ်းညွှန်အမှတ်အသားကို လိုက်နာခြင်းမရှိတဲ့ အတွက်ပါ။

၃။လမ်းဆုံတွင်ယာဉ်(၂)စီးတိုက်ခြင်း။

မိန်းလမ်းမကြီးနဲ့ လမ်းသွယ်ဆိုရင်တော့ လမ်းသွယ်ယာဉ်ရဲ့တာဝန်ပဲ ဖြစ်ပါတယ်။နည်းဥပဒေပုဒ်မ ၁၄၉(ခ)အရ လမ်းမကြီးမှ ယာဉ်သည် ဦးစားပေးရတဲ့အတွက်ပါ။

တကယ်လို့ တူညီလမ်းဆုံမှာဆိုရင်တော့ နည်းဥပဒေပုဒ်မ ၁၄၉(က)အရ လက်ယာဘက်ယာဉ်သည် ဦးစားပေးရပါတယ်။

တူညီလမ်းဆုံသို့ ယာဉ်(၂)စီးတပြိုင်တည်း ရောက်ရှိလျှင် ဦးစွာရောက်ရှိသောယာဉ်ကို ဦးစားပေးရမည်ဖြစ်ပြီး တချိန်တည်းရောက်ရှိလျှင် လက်ယာဘက်ယာဉ်ကို ဦးစားပေးရမည်လို့သက်မှတ်ထားတဲ့အတွက်ပါ။

၄။လမ်းလယ်တွင် မျက်နှာချင်းဆိုင် တိုက်မိခြင်း။

ဒါကတော့ယာဉ်(၂)စီးလုံးမှာ တာဝန်ရှိပါတယ်။ လက်ယာကပ်မောင်းစနစ်ဖြစ်တဲ့ ဒီနိုင်ငံမှာ သာမန်အားဖြင့် မည်သည့်ယာဉ်မဆို လက်ယာကပ်မောင်းရမှာဖြစ်တဲ့အတွက်ပါ။

နည်းဥပဒေပုဒ်မ ၁၄၁မှာလည်း ဖော်ပြထားပါတယ်။ အမြန်လမ်းတွေလို ယာဉ်ကြော(၃)ကြောရှိတဲ့လမ်းဆို လက်ဝဲဘက်အစွန်းကြောသည် ကျော်တက်ရန်နှင့်အမြန်မောင်းနှင်ရန်မှာသာအသုံးပြုရမှာဖြစ်ပါတယ်။

၅။T ပုံသဏ္ဍန်လမ်းဆုံတွင် တိုက်မိခြင်း။

Tလမ်းဆုံမှာတိုက်ရင်လည်း လမ်းမပေါ်ကွေ့ထွက်တဲ့ဲယာဉ်က အမှားပဲ ဖြစ်ပါတယ်။

၆။တည့်ယာဉ်နှင့်ဝဲဘက်သို့ ‘ဂ’ကွေ့ကွေ့သောယာဉ်တိုက်မိခြင်း။

နည်းဥပဒေပုဒ်မ ၁၄၈ နဲ့ ၁၅၀ အရတည့်တည့်လာနေတဲ့ ယာဉ်မရှင်းပဲ ကွေ့တဲ့ယာဉ်က အမှားပဲဖြစ်ပါတယ်။”လွတ်မယ်ထင်လို့ ကွေ့တာပါ” တို့ “ရှေ့ကတည့်တည့်လာတဲ့ယာဉ်က အရှိန်များတာ” တို့ ပြောတက်ကြပါတယ်။ ဘယ်လိုပဲပြောပြောရှင်းရမှာပါပဲ။

၇။လမ်းပြောင်းပြန်ကျော်တက်၍ မျက်နှာချင်းဆိုင်ယာဉ်နှင့်တိုက်မိခြင်း။

နည်းဥပဒေပုဒ်မ ၁၄၆အရ ရှေ့မှမျက်နှာခြင်းဆိုင်လာသော ယာဉ်မရှင်းဘဲလမ်းပြောင်းပြန် ကျော်တက်တက်တဲ့ယာဉ်မှာတာဝန်ရှိပါတယ်။

၈။ဘေးချင်းယှဉ်ကျော်တက်၍ ပွတ်တိုက်ခြင်း။

လက်ဝဲဘက်မှကျော်တက် ပွတ်တိုက်မိသည့်ယာဉ်သာ အမှားဖြစ်ပါတယ်။

၉။အဝိုင်းတွင်ယာဉ်(၂)စီး တိုက်မိခြင်း။

နည်းဥပဒေပုဒ်မ၁၄၉အရ အဝိုင်းပတ်နေတဲ့ယာဉ်သာအမှန် ဖြစ်ပါတယ်။ အဝိုင်းပတ်ယာဉ်ဦးစားပေးရမှာ ဖြစ်ပေမယ့် မြို့တော်တော်များများမှာ အဝိုင်းပတ်နေတဲ့ယာဉ်တွေကပဲ ရပ်ပေးနေတာကိုမြင်နေရပါတယ်။

၁၀။ယာဉ်မှလူကိုတိုက်ခြင်း

စက်တပ်ယာဉ်နဲ့လူ တိုက်မိပြီဆိုရင်တော့ စက်တပ်ယာဉ်သာအမှားဖြစ်ပါတယ်။ ပြောစရာတောင်မလိုလောက်ပါဘူး။

ယာဉ်တိုက်မှုဖြစ်ပွားရတဲ့အကြောင်အရင်းတွေကတော့ယာဉ်မောင်းနှင်သူများရဲ့ပေါ့လျော့မှု/ရာသီဥတု/ ယာဉ်ရဲ့စက်ပစ္စည်းချို့ယွင်းမှု/လမ်းအသုံးပြုသူများရဲ့ပေါ့လျော့မှုတွေကြောင့်အဖြစ်များပါတယ်။

လမ်းအသုံးပြုသူများအားလုံးယာဉ်/လမ်းစည်းကမ်းလိုက်နာကြပါစို့

ဘေးအန္တရာယ်အပေါင်းမှကင်းဝေးကြပါစေ

bozay

Be the first to comment

Leave a Reply

Your email address will not be published.


*